Category: Knowledges

Thihnak Tlak Daan Tat Tikah

By Salai Thawng Pi

Thih tlak dan (penalty death) thawn pehpar in daan ah ziangti’n a um timi himi cahram ah tawi famkim ten ngan kan tum ding. Thih tlak dan a pe theitu hi Pengkulh (district) thuţhentu pawl in a thok. Pengkulh thuţhentu (ခရုိင္တရားသူႀကီး) in thihnak mawh a pek tikah Ramdinkhawm Thuţhen Zung (supreme court) ih lungkimnak laak a ţul. Ramdinkhawm thuţhen zung in nemhngetnak a um hnu lawngah thihnak mawh an pekmi cu hman a theih. Thihnak mawh an pek ni ihsin ni 7 sungah mawhnak a neitu in Tlunlam zung ah (a-yu-khan) a kai thei.

Thih tlak mawh hi zung ah a dotdot in an zohfel hnu lawngah pek a si. Thih tlak dan cu  hri in a hnawng an ţeem ih a thih tiang thlaithat ding a si [CCP S. 368(1)]. Thi dingih dan dat zo mi kha naupai lai a si ahcun Ramdinkhawm thuţhen zung in rem a ti a si ahcun thihnak dan tat loin kum 20 thawngthlak dingin an thleng thei (CCP S. 382). Thih tlak dan an tat mi kha President in mawhpeknak phundang (thihnak tlak dan tatnak si lo ) ah a thlengsak thei (PC S. 54).

Hrekkhat in thih tlak dan an tak ih hridai thawn an thlai tikah hridai a cat ih thi loin um pang sehla that loin a luat thei tivek in a ruat an um. Asinan a dik lo. Thuţhentu in thi dingih thu a ţhenfel le a nemhnget ih a thih tiang thlai that ding a si a ti ahcun hridai a cah khal le an thlai sal thotho ding a si.

images (1)

Hivek in mawhnak a neitu thlaithat ding ni ah Thawng kiltu siannak thawn mawhnak neitu sungkhat unau kum 18 kim zo minung 12 tiang va zoh sian a si. An thah dingmi hi Kor raang a linglet in an hruh. A kep kha dunglam ah ret a si. Thlainak ding hmun par ih an ret tikah a ke pahnih an ţem ding. A mithmai an khuhsak ding. Hridai kha a hngawng ah hnget zetin an ţem ding. Thawng kiltu in na duhmi thla cam aw tiah a ti dingih hridai phelhtu in a phelhsak ding. Mawhneitu a dinnak tang ah sangka a ong aw dingih tanglam ah a thlai aw ding. Sangka tangah tidai a hrek hrawng a ummi a um ih cunah ah a tla ding. Hrekkhat cu hri an phelh ih an ruangpum a thlai aw mi kha a taal phah rero an um. Cuti ih hri an thlai hnu nazi hrek a rei cun Sibawi in zohfelnak a nei. Sibawi in a thi zo tiih a than hlan sung cu cutin a ruangpum thlai a si. Mithi ruang kha sungkhat unau in an dil ahcun pek a si. Diltu an um lo a si ahcun Thawnginn lam in ţuanvo an laak.
U Saw in Bochuk Aung San a rak thah ruangah thih tlak dan tat a rak si. President hnen tiangin zaangfah a rak dil nain hlawhtlinnak a ngah lo. Curuangah May 8, 1948 zinglam khawvang ah Innsein thawnginn ah hridai in thlaithat a rak si. U SAW nupi in a pasal ruak laak a duh nain U SAW in “bawrhhlawh ruang” a si ruangah la hlah aw tiah a cah ta ruangah la sal loin an um. U Saw an rak thlaithat lai ih thah a tong ve mi Sein Kyi cun an thlaithat zikah “duat …… tu caan thok ihsin hi khawvel ah kei ka um nawn lo… hey…” tiah aw thuum zetin a au ta ti a si.

images

Source: U Khin Zaw

Advertisements